طالبان خروج خلبانان نظامی از افغانستان را تأسف‌بار دانست
طالبان با «تاسف‌بار» توصیف کردن خروج خلبانان نظامی دولت سابق افغانستان از کشور، از آنان خواست تا در افغانستان بمانند و با دولت طالبان همکاری کنند.
ذبیح الله مجاهد، سخنگوی طالبان، چهارشنبه، ۱۹ آبان، در یک نشست خبری در کابل تاکید کرد که این گروه به خلبانان حمله نخواهد کرد و آنان بازداشت نخواهند شد.
او گفت: «آنها با هیچ مشکل امنیتی مواجه نخواهند شد و برنامه‌ای برای دستگیری آنها وجود ندارد. خلبانان چه قبلا در ارتش و چه در نیروی هوایی کشوری بوده‌اند می‌توانند در خدمت کشور خود باشند.»
مجاهد گفت، طالبان به خلبانان نظامی نیاز دارد و خروج آنها امری تاسف‌بار است.
شماری از خلبانان نظامی افغان که در تاجیکستان در بازداشت به سر می‌بردند به همراه چندین تن دیگر، سه‌شنبه هفته جاری با یک پرواز که با واسطه ایالات متحده ترتیب داده شد، از تاجیکستان خارج شدند.
خبرگزاری «رویترز» در گزارشی اعلام کرد، این خلبانان افغان از تاجیکستان به آمریکا انتقال داده شدند.
«نیویورک تایمز» پیشتر در گزارشی فاش کرده بود که بیش از ۱۴۳ خلبان، کمک خلبان و کارکنان نیرو‌های هوایی دولت پیشین افغانستان که به تاجیکستان فرار کرده بودند، زندانی هستند و ایالات متحده هیچ کمکی به آنان نکرده است.